f. 77r

Sein Donston was of engelond icome of gode more
miracle oure loure dude for him . er he were ibore
For þo he was inis moder wombe a candel masseday
Þat folk was at chirche mou . as to þe time it lay
As hi stode alle wiþ hore liȝt . as me deþ ȝute nou .
Hore liȝt queinte ouer al . hore non nuste hou
Here riȝt it barnde swuþe wel ⁊ here riȝt it was aloute
Þat folk stod in great wonder and was þerof in great doute
And hy speke ech to oþer in wuche manere it were
Hou it queinte so sodeinliche þe liȝt þa^t hi bere
And hi stode and speke þerof . in gret wonder echon
Sein donstones moder taper . a fure werþ anon
Þat he held þere in hure hond . He nuste wanne it com
Þat folk stod and þa^t bihuld ⁊ gret wonder þerof nom
Ne non nuste wann it com . bote þoru is louerdes gr^ace .
Her of hitende al hore liȝt . aboute in þe place
Wat was þa^t oure louerd crⁱst . fr^am heuene þa^t liȝt sende
And þa^t folk þa^t stod aboute. Hore tapres her of tende
Mote þat ulke holy child . ^thçat in hure wombe was þerre
Al engelonde ssolde beon liȝt . bet þanne it euere were
Þis child was ibore nye hondred ȝer ⁊ fiue ⁊ twenti riȝt
After þa^t oure swece louerd . innis moder was aliȝt .
And þe nerste ȝer of þe crounynge of þe kyng aþelston
His moder het kynedride . is fader het herston .
þo þis child was an eorþe ibore . iis frend nom þerto hede
hi lete it do to glastyngburi ^to norissi and to fede
To teche him ek is bileue. pater noster and crede
Þat child wax and wel iþei - as it moste nede
Lite ȝeine he nom to al þe world . to alle godnesse he drou
Echman þa^t hurde of him speke . hadde of him ioye Inou
Þo he was of mannes Wit . to is uncle hegan go
Þe erche bissop of Canterburi . Seint aldelm þa^t was þo .

{ De scon don-
stano .}